بازنوجوان جُست کُرتگ انت
اى ميل وتى راه دا تگ انت
ھروھدھمے جُستءَ گِرانت
پرچى بلوچ ايرانى انت
اٶ بچ منى , چى بگوشاں
نوں چه کُجا بُنگيج کناں
راجدپترءَ تاکء جناں
گريواں ءُ زارانء گوشاں
گپے گوشان بَچان وتى
آ که نزان انت ھنگتى
چى کرتگ انت دشمن ميٸ
گوں کومءُ راجءَ مٸ وتى
ھشتاد سالءَ پيسراں
شومين بدانءُ رستراں
اے گلزمينءُ سيم سراں
ونڈ ونڈ کُتگ اے ظالماں
سے بھرکُتگ اے جانياں
مشرق گوں پاکستانياں
مغرب شُتگ گوں پارسياں
چنڈے دِگر اوگانياں
کِسه چوش انت اٶبَچ منى
چو که کتاب ءُ دپترى
تاريخءُ راجدپترگوشيت
يا پيروکاں گوشتگ ميٸ
ھست ات يک ملکے پارس په نام
انگريزاں ھست ات يک گُلام
نامى رضا خاں بوتگ ات
جنگءُ مِڈات ھروھد مدام
انگريزءِ حکماںءِ سرا
بوت ملک پارسءِ مسترا
يک ءُ دوسال بازينى کُشت
ھرکونڈءُ شھرءُ ھر گورا
چوکه گوشيت راجدپترا
ميٸ گلزمينءِ ھاتِرا
ھرحاکُمى چه ملکءِ پارس
په لوٹگ ءُ مالءِ سرا
ميى سرزمين قبضه کُتگ
کٶمِش ميٸ بَزگ کُتگ
پيرءُ جوانش جمع کُتگ
درمُلک پارس اش بندکُتگ
بازيں برے چوک چيں کُتگ
ماتءُ پِت اش غمگيں کُتگ
گوں حونءُ حون ريچاں ميٸ
اے گلزمين رنگيں کتگ
گوں ملکءپارسءِ ظلمءُ زور
يک بر پدا گوں دردءُ دٶر
کومءِ بلوچ گوں کُرد ءُ لُر
کُرتگ عرب گوں ترک ھور
ھشتاد سال ءَ ديمتِرا
په لوٹءُ مارءِ ھاتِرا
ايرانءِنامِش زُرت په وت
پارس ھم بدل بوت يکبرا
ايران مه ھِچ راجدپترى
ملکے نبوتگ ھجبرى
اے پنڈلے که سَازِتَگ
اے پارسياں په وتسرى
گوں ظُلمءُ زورءِپارسيان
تُرکءُ بلوچءُ کُردياں
مجبورکُتگ يادبِگِرانت
رسمءُ رواجءِ پارسياں
که پارسى نويس پارسى بواں
کُرد عرب تُرک ءُ بلوچ
پارسى بِجں گپءُ بياں
که ديما برٶت پارسى زباں
بِل که بلوچى بيت زياں
گوں ٹوپ ءُ ٹانکءُ ظلمتاں
دروگين اصول ءُ سُنتاں
ما را گٶشنت ايرانٸ ين
چى بگوشين چه کُنتاں
او ميٸ جوانءُ سر مچار
نوں آتکگيں کرنءَ بچار
دٶر وا شمے گِنت بى شمار
پادا بکن گوانگ ءُ توار
اِے کوهءُ دشت دُريں تياب
اِے سِنگ ءُ حاک پُليں گياب
اِے چَمَگءُ شھجوىءُ آب
درُستاں شمے گنت بى حساب
پادا وطن پِريات کنت
پريات ءُ نالگ بازء کنت
چه دشمنانءِ ظلمءُ زور
آزاتى ءِ کوکارء کنت
ھشتاد سال گون پارسياں
شصت سال گوں پنجاپياں
ماتيں وطن در جيلءُ بند
ھرديم بِچار زوراکياں
کوران گوں دوستءُ سنگتاں
در کپ درآ چه خلوتاں
تا کد چه دورگپءُ حبر
تا کد گوں تُرسءُ کُنَتان
يکجاه ببين يکجاھىءَ
دشمن کنيں بى گواھىءَ
آزات کنين ملکءَ وتى
گون علمءُگوں ھمراھىءَ
کوران دامنى