پاکستان بیگواھیں بلوچاں پدّر بکنت

بشام بلوچ،  تربت

بلوچ جنین آدمیں راہ دربر بانک کریمہ بلوچ تربت ءَ یک پریس کانفرنسے ءِ  تہا لوٹ کتگ کہ پاکستان دستگیر ءُ بیگواہ کتیکیں بلوچاں پدّر بکنت۔

ھشت مارچ ءَ زالبولانی یک مزنیں جلوسے ءَ  راہ دربرے ءَ رند بانک کریمہ بلوچ ءَ تران کت گشت کہ پاکستان ءِ زوراکیں فوج بلوچ گلزمین ءُ  مال ءُ مڈیاں چے بلوچاں زبار کنگ ءِ ھاترا بلوچستان گدانانی سرا بمب گواری کنگ ءَ انت ءُ بلوچ جہدکاراں  دستگیر ءُ بیگواہ کنگ ءَ انت۔ آئے ءَ میان استانی راجانی گل بزاں یو این او ءَ چے لوٹ کتگ کہ آ بنی آدمی ھقانی رکینگ ھاترا پاکستان ءَ زور بدانت کہ آ بلوچانی گونما دربنی آدمی کاراں بدار ایت ۔ ءُ دستگیر کتگیں بلوچاں پدّر بکنت ءُ عدالتاں پیش بکنت۔

چد ءُ ساری چہ فدا شھید چوک ءَ زالبوالانی یک مزنیں جلوسے کشت ءُ  لوٹ کت کہ چاردہ مارچ ھزار ھفت ءَ تمپ ءَ چے دستگیر کتگیں جہدکار واحد قمبر، فضل کریم ، محمد اقبال ءُ فیض بلوچ ءَ پدّر بکنت ءُ عدالتاں پیش بکنت۔

بانک کریمہ بلوچ ءَ  گشت کہ اگاں چاردہ مارچ ءَ چے پیسر اے بلوچ جہدکار پدر کنگ مہ بنت گڈا آ مکرانءِ زالبولاں تربت ءَ مچ کنت ءُ یک مزنیں 
احتجاج ئے کنت۔

www.gwank.org